THERE 1 was a lad was born in Kyle,
But whatna day o’ whatna style,
I doubt it’s hardly worth the while
To be sae nice wi’ Robin.
Chor.-Robin was a rovin’ boy,
Rantin’, rovin’, rantin’, rovin’,
Robin was a rovin’ boy,
Rantin’, rovin’, Robin!
Our monarch’s hindmost year but ane
Was five-and-twenty days begun, 2
‘Twas then a blast o’ Janwar’ win’
Blew hansel in on Robin.
Robin was, &c.
The gossip keekit in his loof,
Quo’ scho, “Wha lives will see the proof,
This waly boy will be nae coof:
I think we’ll ca’ him Robin.”
Robin was, &c.
“He’ll hae misfortunes great an’ sma’,
But aye a heart aboon them a’,
He’ll be a credit till us a’-
We’ll a’ be proud o’ Robin.”
Robin was, &c.
“But sure as three times three mak nine,
I see by ilka score and line,
This chap will dearly like our kin’,
So leeze me on thee! Robin.”
Robin was, &c.
“Guid faith,” quo’, scho, “I doubt you gar
The bonie lasses lie aspar;
But twenty fauts ye may hae waur
So blessins on thee! Robin.”
Robin was, &c.
Note 1. Not published by Burns. [back]
Note 2. January 25, 1759, the date of my bardship’s vital existence.-R. B. [back]
(Robert Burns)
More Poetry from Robert Burns:
Robert Burns Poems based on Topics: Belief & Faith, Gossip- A Dedication (Robert Burns Poems)
- Address to the Devil (Robert Burns Poems)
- A Dream (Robert Burns Poems)
- Address ToThe Devil (Robert Burns Poems)
- Address to the Unco Guid (Robert Burns Poems)
- Address To A Haggis (Robert Burns Poems)
Readers Who Like This Poem Also Like:
Based on Topics: Belief & Faith Poems, Gossip PoemsBased on Keywords: blew, existence, date, kin, wha, worth, line, lad, hardly, begun, robin