ELLISLAND, 21st Oct., 1789.WOW, but your letter made me vauntie!
And are ye hale, and weel and cantie?
I ken’d it still, your wee bit jauntie
Wad bring ye to:
Lord send you aye as weel’s I want ye!
And then ye’ll do.
The ill-thief blaw the Heron south!
And never drink be near his drouth!
He tauld myself by word o’ mouth,
He’d tak my letter;
I lippen’d to the chiel in trouth,
And bade nae better.
But aiblins, honest Master Heron
Had, at the time, some dainty fair one
To ware this theologic care on,
And holy study;
And tired o’ sauls to waste his lear on,
E’en tried the body.
But what d’ye think, my trusty fere,
I’m turned a gauger-Peace be here!
Parnassian queans, I fear, I fear,
Ye’ll now disdain me!
And then my fifty pounds a year
Will little gain me.
Ye glaikit, gleesome, dainty damies,
Wha, by Castalia’s wimplin streamies,
Lowp, sing, and lave your pretty limbies,
Ye ken, ye ken,
That strang necessity supreme is
‘Mang sons o’ men.
I hae a wife and twa wee laddies;
They maun hae brose and brats o’ duddies;
Ye ken yoursels my heart right proud is-
I need na vaunt
But I’ll sned besoms, thraw saugh woodies,
Before they want.
Lord help me thro’ this warld o’ care!
I’m weary sick o’t late and air!
Not but I hae a richer share
Than mony ithers;
But why should ae man better fare,
And a’ men brithers?
Come, Firm Resolve, take thou the van,
Thou stalk o’ carl-hemp in man!
And let us mind, faint heart ne’er wan
A lady fair:
Wha does the utmost that he can,
Will whiles do mair.
But to conclude my silly rhyme
(I’m scant o’ verse and scant o’ time),
To make a happy fireside clime
To weans and wife,
That’s the true pathos and sublime
Of human life.
My compliments to sister Beckie,
And eke the same to honest Lucky;
I wat she is a daintie chuckie,
As e’er tread clay;
And gratefully, my gude auld cockie,
I’m yours for aye.ROBERT BURNS.
(Robert Burns)
More Poetry from Robert Burns:
Robert Burns Poems based on Topics: Man, Fairness, Life, Mind, Fate & Destiny, Honesty & Integrity, Fear, Time, Happiness, Education, Body- A Dedication (Robert Burns Poems)
- Address to the Devil (Robert Burns Poems)
- A Dream (Robert Burns Poems)
- Address ToThe Devil (Robert Burns Poems)
- Address to the Unco Guid (Robert Burns Poems)
- Address To A Haggis (Robert Burns Poems)
Readers Who Like This Poem Also Like:
Based on Topics: Man Poems, Life Poems, Mind Poems, Time Poems, Fairness Poems, Happiness Poems, Fear Poems, Fate & Destiny Poems, Education Poems, Body Poems, Letters PoemsBased on Keywords: rhyme, wife, weel, tread, bit, wad, faint, proud, mony, maun, clay
- Vision of War (Lincoln Colcord Poems)
- Songs Of Seven (complete) (Jean Ingelow Poems)
- Devon's Poly-Obion (Joanna Baillie Poems)
- A Confidant Without Knowing It; Or The Stratagem (Jean de La Fontaine Poems)
- Epistle To Earl Harcourt, On His Wishing Her To Spell Her Name With Of Catherine With A K. (Joanna Baillie Poems)