YE gude for naething thrawn Dunny,
I wish I had eneugh o’ money,
I on some elf wad spend a plack,
To bring ye here upon his back;
Then souse ye down among the snaw,
Tak to his heels, and rin awa,
And leave ye there your tale to tell,
As ye did me,-ye ken yoursel.
Sic treatment I could ne’er expected,
Frae ane that I sae weel respected.
But if ye do what I wish now,
I may forgie ye yet, I trou.
And that is, ca’ at Mrs Rattat’s,
And bring we ye ane twa three caps;
Whilk if ye do, without delay,
Some time I may the favour pay.
And whan that I am weel and canty,
I’se mak ye a’ fu’ blythe and vauntie,
I’se tell a tale, or sing a sang;
To ye a’ the mirky night lang.
Neist time ye are at Mrs T’s.
Gie my respects t’ her, gin ye please,
An’ thank her for a’ favours past,
Before from hence I gang,
For gin I hae a kittle cast,
I winna need them lang.
Speer for that book I lent her last Monday was se’ennit.
An’ gin she hae read it, awa wee ye bring it;
It may chear me a wee bit, whan dowie and wae:
I’se forget my ain cares, whan thinking of they
That other folk meet wi’ in their journey thro life,
Till death his ain-sel’ put an end to the strife.
I’m unco ill, sae I this flite maun end,
Of nae sense, ye may say, eneugh is pennd’
Gie my regards to your auld father,
Your bonnie neice, and sonsy mither,
Your brithers three, and sisters twa,
An’ gin ye like, among them aw,
Ye may put in yoursel.
Nae mair at present frae your muckle offended friend.
(Margaretta Wedderburn)
More Poetry from Margaretta Wedderburn:
Margaretta Wedderburn Poems based on Topics: Friendship, Life, Time, Fathers, Sense & Perception, Respect, Past, Money & Wealth, Present- Mary Queen Of Scots, An Historical Poem (Margaretta Wedderburn Poems)
- The Author's Farewell To Edinburgh.-1810. (Margaretta Wedderburn Poems)
- Scenes Of Youth, Or The Days Of Other Years,- 1809.- In Two Parts. (Margaretta Wedderburn Poems)
- Dalkeith, On The Happy Days I Have Enjoyed WithIn Its Bonny Bounds. (Margaretta Wedderburn Poems)
- The Sky, Or A Description Of A Fine Evening: August 17. 1808. (Margaretta Wedderburn Poems)
- An Address To My Friends, When It May Be Supposed, That They Have Read The Contents Of This (Margaretta Wedderburn Poems)
Readers Who Like This Poem Also Like:
Based on Topics: Life Poems, Time Poems, Sense & Perception Poems, Friendship Poems, Money & Wealth Poems, Past Poems, Fathers Poems, Present Poems, Respect PoemsBased on Keywords: plack, neist, kittle, dowie, whilk, speer, yoursel, forgie, eneugh, brithers, sonsy