“SAW ye Johnny comin?” quo’ she,
“Saw ye Johnny comin?
Wi’ his blue bonnet on his head,
And his doggie runnin.
Yestreen about the gloamin time
I chanced to see him comin,
Whistling merrily the tune
That I am a’ day hummin,” quo’ she,
“I am a’ day hummin.”
“Fee him, faither, fee him,” quo’ she,
“Fee him, faither, fee him;
A’ the wark about the house
Gaes wi’ me whan I see him:
A’ the wark about the house,
I gang sae lightly through it;
And though ye pay some merks o’ geer,
Hoot! ye winna rue it,” quo’ she,
“No; ye winna rue it.”
“What wad I do wi’ him, hizzy?
What wad I do wi’ him?
He’s ne’er a sark upon his back,
And I hae nane to gie him.”
“I hae twa sarks into my kist,
And ane o’ them I’ll gie him;
And for a merk o’ mair fee,
O, dinna stand wi’ him,” quo’ she,
“Dinna stand wi’ him.”
“Weel do I lo’e him,” quo’ she,
“Weel do I lo’e him,
The brawest lads about the place
Are a’ but haverels to him.
O fee him, faither; lang I trow
We’ve dull and dowie been;
He’ll haud the plough, thrash i’ the barn,
And crack wi’ me at e’en,” quo’ she,
“Crack wi’ me at e’en.”
(Joanna Baillie)
More Poetry from Joanna Baillie:
Joanna Baillie Poems based on Topics: Place- Mac Duff's Cross (Joanna Baillie Poems)
- A Summer Day (Joanna Baillie Poems)
- A Winter Day (Joanna Baillie Poems)
- Evening (Joanna Baillie Poems)
- Fragment Of A Poem (Joanna Baillie Poems)
- Night Scenes Of Other Times (Joanna Baillie Poems)
Readers Who Like This Poem Also Like:
Based on Topics: Place PoemsBased on Keywords: hummin, dowie, thrash, geer, brawest, doggie, sarks, gaes, merk, merks, hizzy