Row, Kello, row frae rocky linns,
An’ through amang thy grassy braes,
Where gowans grow an’ hawthorns blaw,
An’ sunshine sleeps on summer days.
Slip saftly by the quarry howm,
Where hingin’ hazels hap thy tides;
Then murmur through aneath the brig,
An’ by the cot where Annie bides.
Row, Kello, row to where the Nith
Half waits to clasp thy floods sae clear,
But leave ahin’ the happy soun’
That Annie still delights to hear.
She walks by thee when gloamin’ dims
An’ darkens doon the vocal glen,
But what her ain sweet thochts can be
Nane but hersel’ an’ thee may ken.
Row, Kello, row when summer flings
A wealth o’ licht the hills alang,
An’ row when autumn’s yellow han’
Shakes doon the nits the leaves amang.
An’ row when winter’s rouky breath
Strips a’ the cleedin’ frae the tree,
But leave to Annie still the thochts
At gloamin’ when she walks by thee.
(Alexander Anderson)
More Poetry from Alexander Anderson:
Alexander Anderson Poems based on Topics: Summer, Nature, Happiness, Money & Wealth- A Walk To Pamphy Linns (Alexander Anderson Poems)
- The Landlord's Best (Alexander Anderson Poems)
- Cameron's Stone (Alexander Anderson Poems)
- Alexis (Alexander Anderson Poems)
- The Two Angels (Alexander Anderson Poems)
- To An Old Schoolfellow (Alexander Anderson Poems)
Readers Who Like This Poem Also Like:
Based on Topics: Nature Poems, Happiness Poems, Money & Wealth Poems, Summer PoemsBased on Keywords: hazels, hawthorns, hersel, aneath, licht, hingin, nith, gloamin, alang, gowans, soun