O! can’le licht’s baith braw and bricht
At e’en when bars are drawn,
But can’le licht’s a dowie sicht
When dwinin’ i’ the dawn.
Yet dawn can bring nae wearier day
Than I hae dree’d yestre’en,
An’ comin’ day may licht my way-
Daylicht has mony een.
Noo, daylicht’s fairly creepin’ in,
I hear the auld cock craw;
Fu’ aft I’ve banned him for his din,
An’ wauk’nin’ o’ us a’!
But welcome noo’s his lichtsome cry
Sin’ bed-fast I ha’e been,
It tells anither nicht’s gane by-
Daylicht has mony een.
O! bed-fast men are weary men,
Laid by frae a’ their wark;
Hoo thocht can kill ye ne’er will ken
Till tholin’ ‘t in the dark.
But ere nicht fa’s I’ll maybe see
What yet I hinna seen,
A land whaur mirk can never be-
Daylicht has mony een.
(David Rorie)
More Poetry from David Rorie:
David Rorie Poems based on Topics: Man- Tam And The Leeches (David Rorie Poems)
- The Nicht That The Bairne Cam' Hame (David Rorie Poems)
- The Bane-Setter (David Rorie Poems)
- Brithers (David Rorie Poems)
- MacFadden And MacFee (David Rorie Poems)
- The Pawky Duke (David Rorie Poems)
Readers Who Like This Poem Also Like:
Based on Topics: Man PoemsBased on Keywords: dree, craw, bricht, thocht, whaur, creepin, sicht, nin, wearier, dowie, wark