The corn was turnin’, hairs t was near,
But lang afore the scythes could start
A sough o’war gaed through the land
An’ stirred it to its benmost heart.
Nae ours the blame, but when it came
We couldna pass the challenge by,
For credit o’ our honest name
There could be but the ae reply.
An’ buirdly men, fae strath an’ glen,
An’ shepherds fae the bucht an’ hill,
Will show them a’, whate’er beta’,
Auld Scotland counts for something still.
Half-mast the castle banner droops,
The Laird’s lament was played yestreen,
An’ mony a widowed cottar wife
Is greetin’ at her shank aleen.
In Freedom’s cause, for ane that fa’s,
We’ll glean the glens an’ send them three
To clip the reivin’ eagle’s claws,
An’ drook his feathers i’ the sea.
For gallant loons, in brochs an’ toons,
Are leavin’ shop an’ yaird an’ mill,
A’ keen to show baith friend an’ foe
Auld Scotland counts for something still.
The grim, grey fathers, bent wi’ years,
Come stridin’ through the muirland mist,
Wi’ beardless lads scarce by wi’ school
But eager as the lave to list.
We’ve fleshed o’ yore the braid claymore
On mony a bloody field afar,
But ne’er did skirlin pipes afore
Cry on sae urgently tae war.
Gin danger’s there, we’ll thole our share,
Gie’s but the weapons, we’ve the will,
Ayont the main, to prove again
Auld Scotland counts for something still.
(Charles Murray)
More Poetry from Charles Murray:
Charles Murray Poems based on Topics: War & Peace, Man, Liberty & Freedom, Fathers- Fae France (Charles Murray Poems)
- The Alien (Charles Murray Poems)
- Hame (Charles Murray Poems)
- Hamewith (Charles Murray Poems)
Readers Who Like This Poem Also Like:
Based on Topics: Man Poems, War & Peace Poems, Fathers Poems, Liberty & Freedom PoemsBased on Keywords: yestreen, scythes, shank, turnin, greetin, ayont, half-mast, couldna, thole, tae, leavin